والله حنغمس الايس كريم بالعيش

أحب قبل ما أبدأ كلامي أوضح اني قررت المره دي وانا بكتب اني اتخلى عن اسلوبي اللي دايماً كان واضح فيه اني ساخر وبستهزء بكل حاجه ، لكن للأسف قليلين اللي فهموا اني جايز أكون بعبر عن اللي شايفه أو يمكن أكون بحاول أحلوا باسلوب مختلف... بس لازم الواحد يقول اللي ليه واللي عليه... ان فيه حاجات ماتنفعش تتعالج بالسخريه أو تهريج ومش بعيد تكون محتاجه شوية واقعيه،وبعدين أصلاً هي مابقتش حاجات دي مصايب أيوه مصايب، ماهو كل حاجه صغيره نقول عليها حاجات مش مهمه أو مالهاش لازمه نكتشف بعد كده انها مصيبه أو كارثه من كوارث الزمن.

للأسف انا أنا بخاطب في الرساله دي كل واحد شايف نفسه رد فعل، حاول تبقى فعل يا أخي ... كل واحد شايف نفسه بعد الهامش ووجوده مالهوش لازمه.... كل واحد مستني اللي يحطله المعلقه في بقه ويقوله كل يا ضنايا وشد اللحاف... فوقوا الله يلعن كل من هو سلبيييي.... ماهو مش هنتغير الا بإراده وعزيمه جوانا احنا اللي هنحركها... بأي دافع بقى اذا كان مستقبل أو حياة أفضل أو حتى قوت يومك وأكلك.

لازم نتغير ونغير تفكيرنا وطباعنا في كل مكان وزمان... ده حتى أضعف الايمان مابيتعملش... طيب مافيش حل... في كل حته وكل مكان مشاكل، وانت رايح شغلك وانت راجع، حتى وانت في الشغل... وانت بتشتري حاجه ،وانت بتبيع... حتى لو بقيت في حالك... هتحس ان حد بيسوقك ويقولك شيييي يا حماااااااار... مافيش فايده في طبع ناس وشعب اتعود على اللامبالااااااه .... اللهم يالا نفسي وكل اللي حولايا يولعو بجاز... الموضوع ده مالوش نهايه،

والحكايه مابتنتهيش... بس احنا لازم نعيش...

بالطول بالعرض ادينا موجودين.

وكل كذبة ابريل وانتوا مسطولين...

ومانجلكوش في حاجه وحشه ياحلوين......

الحدق يفهم

سبحان الله ولا حول ولا قوة إلا بالله. قاعد في أمان الله كده بتفرج على التليفزيون ولاقيت أغنية يبقى انت أكيد أكيد في مصر :D
حاجه تفرح، ياسلااااااااااااااااااااااام لازم تبقى فخور انك مصري وتبقى فرحان كده ومعتز بمصريتك وسعيد وأشرف وتامر وشيرين.
قالك بقى، وبصراحه أنا ماعرفش مين اللي قال أصلاً بس مش مشكلتنا، ان الاعلان ده اتكلف مليون جنيه، وحسيت يعني انها معلومه مؤكده، عمار يا بلد.
شويه وجيه اعلان تاني ... طبعاً يا جماعه أنا بتفرج على القنوات المحليه علشان برامجها متنوعه وهااااادفه ومش ممله نهائيييييي وسلملي على في بيتنا نجم هههه وماقولكش على السهره الرياضيه وابداعات التالته... أه والله عجبي.
يا عم ولا روتانا ولا ميلودي ولا أي حاجه من الحاجات دي.. هي القنوات المحليه.....ماشي .... طيب ايه رأيك بقى ان احنا جبنا ماتشات بطولة افريقيا بالفرنساوي .. يالا يا عم أي خدمه.
وكمان جبنا بنات تعلق على الماتشات... العب ياريس :D هو في كده ؟!!
أه في كده وعندنا هنا بس ومش هتلاقي في حته تانيه ....
على رأي عادل امام كل ما نعلا ونعلا ونعلا لازم نطاطي نطاطي نطاطي... ومانجلكوش في حاجه وحشه.

الفالنتين داي وعلاقته بالمهلبيه وأبو حلاوه ياتين

أي كلام في أي حته في أي ركن، المهم تعيش والحياه حلوه والعب ياريس، ده احنا هنشوف في ال24 ساعه دي عجب العجااااااااااب أه والله ، هتلاقي سميره وباكينام وفتحيه ووائل وسيد وأنا وانت، كله باللفه والهديه ماشي، ولابس الحته اللي على الحبل.... أي كلام .... ده غير الحديقه الدوليه واللي بيحصل فيها وعجبييييي....المهم بقى سيبك من الناس دي ونروح على محلات الهدايا.... موسم يابا موسم، أي لفه في أي قفص فراخ بقى ولا عصافير كله بيمشي مع الدبدوووب وياسلام بقى لو جبت شوكلاته علشان تبقى شاب جينتل... وكع وادفع ياريس و ادفع يازبون (أو زبونه) مش فارقه.. المهم انك تفرح وهي تفرح وصاحب المحل يضحك عليكوا ههههه....

برضه مش مشكله الحياه حلوه يعني ...أنا بصراحه اللي أعرفه ان أي 2 بيحبوا بعض بجد مش بيهتموا بالفالنتين ده وأنا من الناس دي وكنت هشوفوا يوم عادي لولا بس ان عيد ميلادي 14-2 ... ناس بتقول اني محظوظ وأنا بحس ان الناس كلها بتحتفل بيا:D ،،،موضوع بقى الفالنتين ده جيه ازاي... سمعت مره كده ان كان فيه قريه ماعرفش قتلوه فيها واحد كان بيحب أميرة القريه دي فعملوا مظاهره ساعتها وكان اليوم ده يوه 14-2 فعملوه عيد الحب.

Happy valentine طيب للناس اللي بتحب اليوم ده ومانجلكوش في حاجه وحشه

الحياة حلوة !!!

مش ممكن رد الفعل العجيب اللي بشوفة لما بقول فى وش اى واحد الكلمة الجميلة دى( الحياة حلوة يا عم ) و يفضل يضحك من كل قلبه عليها بس مش مشكلة . لغاية يوم من الايام قررت انى لازم و لابد يعنى بقى اعرف الناس بتضحك ليه !!! يحضرنى بقى موقف جميل هههههه كنت مرة كدة بتمشى حبة زى كل مخليق ربنا طبعاً عشان زهقت من زحمة الشوارع و ملل الطريق و طبعا طبعا عشان سعر البنزين القليل اوى اوى بسسسسسس مش مشكلة الحياة بردو حلوة و ا هو الواحد بيعمل رياضة و بتاع .المهم فى طريقى لقيييييت اسرة رايحين على مكدونلدز و كانوا فرحانيين اوى و هما بيفتحوا باب عمو مكدونلدز و العيال بتجرى حايكلوا الهابي مييييل , لازم يفرحوا برضوا ولا اييييية . قولت طيب والله كويس يعنى دة حتى يعنى مكدونلدز اعلاناته جميلة و الطماطم بتلمع و الفلاحين فرحانين و حاجة تفرح . طيب ما الحياة حلوة اهية . ولا ايييية ....المهم شوية و شفت العيلة برضوا هية هية طالعين و الراجل متنرفز اوى و العيال برضوا فرحنين و بيقولهم مفيش اكل تانى برة . ههههههههه . واضح ان المرتب طار , " حمادة يلعب و نهى تلعب و بابا يشد فى شعرة " بسسسس مش مشكلة برضوا الحياة حلوة .... بسسس . مش عايز اطول اكتر من كدة عليكم و خصوصا ان دى اول مشاركة ليه بس انا كدة وريتكوا ان الحياة حلوة و الامثلة كتير ...... ولا ايييييية . بس امبارح بجد الحياة كانت حلوة اوى و الناس فرحنين و سهر لحد الفجر , مصر فى النهائى و حتلعب على الكاس ..يارب على طول و منجلكوش فى حاجة وحشة ....